လူငယ်မောင်မယ်များနှင့်
အလှူဒါနပြုလုပ်ခြင်း
လူငယ်မောင်မယ်တို့ရေ…
နောက်ဆုံးအဖြည့်သဘောအနေနဲ့ ဒါနပြုလုပ်ဖို့အကြောင်းလေးလည်းကိုပြောပေးဦးမယ်။
ရှေ့ကပြောလာခဲ့တဲ့ အထဲမှာ သီလနဲ့ဘာဝနာအကြောင်းသာပါပြီး ဒါနအကြောင်းမပါလို့ ဒါနဟာလည်းတကယ်ကိုပြုလုပ်သင့်တဲ့
အရာတစ်ခုဆိုတာသိအောင် ပြောပြပေးချင်လို့ပါ။
ဒါန၊သီလ၊ဘာဝနာသုံးမျိုးဟာ အမြဲတမ်းဒွန်တွဲနေတာအကောင်းဆုံးဘဲကွ။
ဒါမှသာလျှင် ကိုယ်လုပ်သမျှ ယခုဘ၀ရော နောင်သံသရာမှာပါအရာရာပြီးပြည့်စုံနေမှာမို့ပါ။မင်းတို့မြင်ဖူးသမျှလူတွေကိုသေချာကြည့်လိုက်
အချို့ရုပ်ရည်လှပတယ်ချမ်းတော့ မချမ်းသာဘူး။ အချို့ကရုပ်ရည်မလှပကြဘူး
စည်းစိမ်ဥစ္စာတော့ပေါများကြတယ်။
အချို့ကရုပ်လည်းဆိုးတယ် ချမ်းလည်းမချမ်း သာကြဘူး။အချို့ကချမ်းလည်းချမ်းသာတယ်ရုပ်အဆင်းလည်းကောင်းမွန်တယ်။အချို့ကဉာဏ်ပညာထက်မြတ်တယ်။အချို့က
ဉာဏ်ပညာနုံချာတယ်။ ဒီလိုကွဲလွဲနေတာကိုတွေ့ရလိမ့်မယ်။ ဒီပြဿနာတွေရဲ့အဖြေကဒါပဲကွ။ ဒါန
သီလ ဘာဝနာ ကောင်းမှု တွေကိုခွဲခြားပြုလုပ်ခဲ့လို့အားသန်ရာကပဲ ဒီဘ၀မှာလာအကျိုးပေးကြတယ်။
ဒါနဆိုတာ စည်းစိမ်ကိုပေးတယ်။ သီလကရုပ်အရည် အဆင်းကိုပေးတယ်။ ဘာဝနာကဉာဏ်ပညာကိုပေးတယ်ဒီလိုအကြမ်းအားဖြင့်မှတ်ထားရမယ်။အနုစိတ်အနေနဲ့ဆိုရင်တော့
အ ကျိုးပေးက တစ်မျိုးစီမှာ များစွာရှိတာပေါ့။
ကိုကြားဖူးတဲ့ဥပမာလေးရှိတယ်။ ငှက်ကလေးတစ်ကောင်ဟာ
သရက်ပင်ပေါ်ကသရက်သီးကိုစားဖို့ ပထမတောင်ပံနဲ့
အပင်ပေါ်ရောက်အောင်ပျံသန်းရတယ်။ဒုတိယ ခြေထောက်နဲ့ကိုင်းမှာနားရတယ်။တတိယ နှုတ်သီးနဲ့ထိုးဆိပ်စားရတယ်တဲ့
တ ကယ်လို့များ ငှက်ကလေးမှာ အင်္ဂါတစ်ခုခု ချို့ယွင်းနေမယ်ဆိုရင် သရက်သီးကိုတော့ စားလို့ရကောင်းရမယ်အလွန်အင်မတန်
ဆင်းရဲပန်ပင်းကြီးစွာလုံ့လပြုရလိမ့်မယ်တဲ့ အဲလိုပဲပေါ့ကွာ ဘ၀မှာအရာရာပြည့်စုံချင်တယ်ဆိုရင်တော့
ဒါန သီလ ဘာဝနာသုံးဖြာ တရားလုံးပြုလုပ်လိုက်နာစောင့်ထိန်းဖို့လိုတယ်။ တစ်ခုခုအားနည်းရင်
ကိုဖြစ်ချင်တာရချင်တာ ကိုအလွန်ပင်ပန်းကြီးစွာ ဒုက္ခနဲ့ တွေ့ပြီးမှရနိုင်တယ်။ ဒုက္ခမတွေ့ချင်ပဲလွယ်ကူချမ်းသာစွာရလိုကြတယ်ဆိုရင်တော့
သုံးဖြာတရားလိုက်နာပွားဖို့လိုအပ်လှတယ်။
ဒါကြောင့် ဘ၀မှာ သီလ၊ဘာဝနာအပြင် ဒါနကိုလည်းပြုဖို့လိုအပ်တယ်ဆိုပြောပြပေးရတာ။
ဒါနဆိုတာ မဆင်းရဲဖို့လို့ပဲ မှတ်ထားပေါ့။ လှူဒါန်းပေးကမ်းစွန့်ကြဲခြင်းကို ဒါနလုိ့ခေါ်တယ်။
ဒါဖြင့်ပေးကမ်းစွန့်ကြဲတာဟာကိုယ်ရတာမှမဟုတ်တာ ကိုယ်က ကုန်သွားတာပဲ ကုန်တာဟာဆင်းရဲတာပဲချမ်းသာတာမှမဟုတ်တာ
ဘာလို့ ဒါနဆိုတာမဆင်းရဲဖို့လုပ်တာလို့ပြောလဲလို့ မောင် မယ်တို့မေးခွန်းလေးများမထုတ်ချင်ကြဘူးလား။
ဟုတ်တယ် လက်ရှိမှာကိုယ်ကကုန်သွားတယ်လို့ဆိုပေမယ့် တကယ်တန်းက ကုန်တာမှမဟုတ်တာ နောင်အနာဂါတ်အတွက်စုဗူးထဲမှာငွေစုထားတာပဲ။လိုအပ်တဲ့အခါပြန်ရလာမယ်ဆိုတာမှတ်ထားပေါ့။
လော ကထဲမှာ အတိုးပေးထားသလိုမျိုးပေါ့။မြတ်ဗုဒ္ဓကတော့ ဒါနပြုတယ်ဆိုတာ ယာခင်းထဲမှာမျိုးစေ့ကြဲထားတာနဲ့တူတယ်လို့ပြောထား
တယ်။ မျိုးစေ့ကအပင်ပေါက်အသီးသီးလာတဲ့အခါ များစွာတိုးပွားလာတယ်ဆိုတာ တောင်သူလုပ်ဖူးတဲ့လူငယ်မောင်မယ်တို့ဆို
ပိုသိလိမ့်မယ်။
ဒီတော့ဒါနဆိုတာရင်းနှီးမြုတ်နှံတာလို့မှတ်ယူထားရမယ်။
ယာခင်းမှာမျိုးစေ့ချထားပြီးတဲ့နောက် မြေ ရေ လေ နေ သဘာ ၀တွေဖောက်ပြန်ရင်သီးနှံအထွက်နည်းသလို
လှူဒါန်းတဲ့နေရာမှာ စေတနာသုံးတန်ဖောက်ပြန်ရင်အကျိုးပေးနည်းသွားတယ်။ ဒါကြောင့်မောင်မယ်တို့
လှူတယ်ဆိုရင် စေတနာသုံးတန်ပြတ်သားဖို့တော့လိုအပ်တာပေါ့။ စေတနာမပြတ်လှူတယ်စေတနာတွေ အကုန်ပျက်ပြားတယ်ဆိုရင်တော့
မျိုးစေ့ချတာနဲ့မတူဘူးကွ။ မျိုးစေ့တွေကို ရေထဲမှာအလကားသွန်ပစ်လိုက်တာနဲ့တူတယ်။ ဒါဆို
ရင်တော့လှူတာဟာ ဆင်းရဲဖို့ဖြစ်သွားတတ်တယ်။ နာမည်ရချင်လို့ လူအထင်ကြီးခံစေချင်လို့ စေတနာမပါဘဲလှူတာမျိုးတော့
မဖြစ်စေကြနဲ့ပေါ့။
အလှူတစ်ခုပြုမယ်ဆိုရင် မလှူမှီဖြစ်ပေါ်လာတဲ့ပုဗ္ဗစေတနာ၊လှူဒါန်းဆဲမှာဖြစ်ပေါ်လာတဲ့မုဉ္စစေတနာ၊လှူဒါန်းပြီးပြန်တွေး
မိတိုင်းဖြစ်ပေါ်လာတတ်တဲ့အပရစေတနာသုံးတန်မချို့ယွင်းဖို့လိုအပ်တယ်ဆိုတာတော့ မောင်မယ်တို့သိပြီးသားတွေပါ။ဒီတော့
လှူမယ်ဆိုရင် ဒီအချက်တွေတော့သတိထားကြပေါ့ကွာ။ အလှူဟာနည်းသည်ဖြစ်စေများသည်ဖြစ်စေလှူသူရဲ့စေတနာပေါ်မှာ
ဦးတည်ပြီးအကျိုးပေးများတယ်ဆိုတာသဘောက်ပေါက်ထားရမယ်။ မျိုးစေ့ချစိုက်တာခြင်းတူပေမယ့်လို့
စိုက်ပျိုးမှု စောင့်ရှောက် ရေလောင်းပေါင်းသင်မှုပေါ်မှာမူတည်ပြီးအသီးအနှံအထွက်တိုးတဲ့သဘောပေါ့။
ကဲထားတော့ အလှူရဲ့အကျိုးတရားလေးတွေကိုမောင်မယ်တို့သိအောင်ထပ်ပြောချင်သေးတယ်။
ဒီနေရာမှာတစ်ခုသတိ ထားရမှာက အလှူကြောင့်ရရှိမဲ့စည်းစိမ်ချမ်းသာသုခတစ်ခုတည်းလိုချင်လို့လှူတဲ့အလှူဟာအနိမ့်စားအလှူ။
မဂ်ဖိုလ်နိဗ္ဗာန်သွား ရာအထောက်အပံ့ကောင်းဖြစ်စေချင်လို့
နိဗ္ဗာန်သို့သွားတဲ့လမ်းမှာ ပြည့်ပြည့်စုံစုံကုံလုံဥစ္စာလှူဒါဝေငှပြီး လမ်းခရီးချောချောမော
မောအောင်မြင်ရာလှေကားထစ်ဖြစ်စေချင်လို့လှူတဲ့အလှူဟာအမြင့်သားအလှူလို့တော့မှတ်ထားရမယ်။
အဓိပ္ပါယ်ခြင်းတူသ ယောင်ရှိပေမယ့် ရလိုမှုကွာခြားလို့ပဲ။
ဒါကတော့ သိထားဖို့ပြောပြတာပေါ့။ဘယ်လို လိုချင်လို့လှူလှူစေတနာပြတ်သားမှန်ကန်ရင်တော့
လက်ရှိဘ၀နောင် ဘ၀အကျိုးတရားတွေရမှာတော့အသေအချာပဲ။ လှူတယ်ဆိုတာ ပြောရတာလွယ်သလောက် လုပ်ရတာခက်ခဲတယ်ကွ။ဘာလို့
လည်းဆိုတော့ ကိုယ်ပိုင်ချွေးနဲ့သွေးနဲ့ရင်းပြီးရှာထားတဲ့ ဥစ္စာတွေကို ကိုယ်ပိုင်ဆိုင်တဲ့ပစ္စည်းတွေကို
သူများဒီအတိုင်းအလကား ပေးလိုက်ရမဲ့အရာလေ ။ဘယ်သူမဆိုနှမျှောတာပဲ တွန့်တိုတာပဲ နှမျှောတွန့်တိုခြင်းကို
လွန်မြောက်အောင်တိုက်ခိုက်ပြီး လှူရတာ မို့ အင်မတန်ပင်ပန်းတယ်။အလှူဆိုတာ ပေးခြင်းမဟုတ်ယူခြင်းသာဖြစ်တယ်လို့
သိပြီးလှူလိုက်နိုင်တယ်ဆိုရင်တော့ လတ်တ လောရမယ့်အကျိုးက လှူလိုက်တဲ့ပစ္စည်းပေါ်နှမျှောနေတဲ့လောဘကိုပယ်နိုင်သူတစ်ယောက်ဖြစ်သွားတာပါပဲ။
အလှူဟာဘ၀မှာ တိုက်တာအိုးအိမ်ရွှေငွေရတနာအရာရာပြည့်စုံအောင်ပြုလုပ်ပေးတတ်တယ်ဆိုတာမောင်မယ်တို့တွေ
ဘုရားဟောခဲ့တဲ့ဇာတ်နိပါတ်များစွာမှာ ဖတ်မှတ်သိဖူးပြီးပဲဖြစ်လိမ့်မယ်။ သူငယ်ချင်းနှစ်ယောက်
တစ်အိမ်ထဲမှာ အတူမွေးတာ ခြင်းအတူတူ အိမ်ရှင်နဲ့ အခိုင်းစေကျွန်မှာမွေးလာရတဲ့အထိလှူသူနဲ့မလှူသူကွာဟလှတယ်။
နောင်ဘ၀နောင်သံသရာအတွက် အသာထားပါဦးလက်တွေ့ ဘ၀မှာအလှူကြောင့်ဘယ်လိုအကျိုးတွေရမှာလဲဆိုရင်အစောကပြောခဲ့သလို
လှူလိုက်တဲ့ပစ္စည်းအ ပေါ်မှာကပ်တွယ်နေတဲ့ လောဘကိုအရင်သတ်နိုင်ကျိုးရသွားတယ်။ဒီတော့လှူလိုက်တဲ့ပစ္စည်းကြောင့်
ဖြစ်ပေါ်လာနိုင်တဲ့ အန္တရယ် တွေကင်းသွားခြင်းအကျိုးတွေရတယ်။
ရောက်လေရာအရပ်တိုင်းမှာ ထမင်းမငတ်ရေမငတ်ဘူး။
လိုအပ်နေတဲ့နေရာမှာလိုအပ်သလိုလှူထားတဲ့အတွက် ကိုယ့် အတွက်အရေးပေါ်လိုအပ်လာပြီဆိုရင်
မထင်မှတ်ပဲရရှိလာနိုင်တယ်။ အများသူငှာနဲ့ဆက်ဆံတဲ့နေရာမှာ အရေးပေးခြင်းကိုခံရ တတ်တယ်။
ငတ်ပြတ်မဲ့အရေး စားနိုင်သောက်နိုင်အောင်ပြန်လည်ဖြစ်လာနိုင်သလို ပိုမိုပြီး ထီထပေါက်တာမျိုးဆင်းရဲမှုနဲ့ကြုံမဖြုံ
အောင်အကျိုးတရားတွေရတတ်တယ်။ ကိုယ့်ရဲ့ဂုဏ်သတင်းကျော်ဇောထင်ပေါ်တတ်တယ်။ ချစ်ခင်သူများရန်သူရှားပြီး
ပျောက် သောပစ္စည်းများပြန်လည်တွေ့ရတတ်တယ်။ ရရှိနေတဲ့ပစ္စည်းပိုမိုတိုးပွားစေတတ်တယ်။
မောင်မယ်တို့ရေ..ဘ၀မှာ ငတ်ပြတ်မွဲတေ ဆင်းရဲနေရင်အလှူဒါနမမေ့ကြနဲ့ကွ။မရှိလို့မလှူမလှူလို့မရှိ၊ရှိလို့လှူ
လှူလို့ရှိ ဆိုတာ မျိုးကြီးမဖြစ်စေပဲ။မရှိလည်းလှူ လှူလို့ရှိ ပါဖြစ်အောင်ကြိုးစားကြစေလိုတယ်။
များများလှူစရာမရှိရင်တောင် ကိုယ်စားပြီး ပါးကန်မှာ ကပ်ကျန်နေတဲ့ထမင်းလုံးလေးတွေကို
သတ္တ၀ါလေးတွေစားရပါစေဆိုပြီး သေချာစွန့်လှူလို့ရတယ်ကွ။ စေတနာမရှား ရင်လှူစရာအများကြီးကိုယ့်မှာရှိတယ်။
လမ်းသွားရင်း နေရာလှူနိုင်တယ်။ ရေဆာသူကို ကိုယ့်မှာပါလာတဲ့ရေသန့်ဗူးလှူနိုင်တယ်။ မုန့်သရေစာတွေ
ကိုလှူနိုင်တယ်။ နောက်ဆုံးအိမ်မှာထမင်းချက်တယ်ဆိုရင်တောင် အမြဲချက်တဲ့ဆန်ငါးဗူးထဲက
တစ်ဇွန်းလောက် ခွဲပြီးအိုးလေးထဲထည့်ထားများလာတဲ့အခါ လှူနိုင်တယ်။ ဒါဆိုနေ့စဉ်လည်းဒါနမြောက်
ပစ္စည်းဥစ္စာများစွာလည်းမလိုပဲလှူလို့ရ တာပေါ့။
ယနေ့တောင်တန်းဒေသနဲ့ သဘာဝဘေးသင့်ဒေသတွေမှာ
ကိုယ်ဝတ်ဆင်နေတဲ့အ၀တ်အစားတွေခွဲဝေလှူဒါန်းတာတွေ လည်းလုပ်နိုင်တယ်။ လှူတယ်ဆိုတာအင်မတန်မွန်မြတ်တဲ့အရာပဲကွ။
လိုအပ်တဲ့နေရာမှာလိုသလိုလှူတတ်ဖို့တော့လိုတာပေါ့။ ဥပမာကွာ သင်္ကန်းသပိတ်ပုံနေအောင်ပေါတဲ့ကျောင်းမှာ
သင်္ကန်းသပိတ်တွေသွားလှူတာမျိုးမဖြစ်စေနဲ့ပေါ့။ အလှူခံသူမှာလိုအပ် နေတဲ့အရာမဟုတ်လို့
ဝမ်းသာမှုနည်းသလို ကိုယ်လည်းအကျိုးရနည်းတာပေါ့။ အ၀တ်အစားရှားပါးသူကို အ၀တ်အစားလှူလိုက်
ရင်သူ့ခဗျာဝမ်းသာလွန်းလို့ ကျေးဇူးတင်မဆုံးဖြစ်ရသလို ကိုယ့်မှာလည်းသူ့ကိုကြည့်ပြီးကြည်နူးမှုပီတိတို့
တဖွားဖွားဖြစ်ပေါ်လာ တတ်လို့စိတ်ကြည်နူးရွှင်လန်းတယ်။ အဲလို ကြည်နူးမှုကိုက လက်တွေ့ရတဲ့အကျိုးတရားပဲကွ။
ဒီလိုကြည်နူးမှုမျိုးတွေအမြဲရ အောင်လုပ်ယူလို့မရဘူး။
နောက်မွန်မြတ်လှတဲ့အလှူပုံစံတစ်ခုကိုပြောပြဦးမယ်။
လူတစ်ယောက်ဟာအဆာရေစာငတ်ပြတ်ပြီး ဒီတစ်နပ်မှမစားရ ရင်အသက်သေတော့မဲ့အခြေအနေ အဲအချိန်နေ့လည်စာပင်မစားရသေးတဲ့ကိုယ်က
ညနေပိုင်းစားစရာရလာလို့ စားမည့်ဆဲဆဲမှာ အစောကလူကိုတွေ့ရင် ဆာတာခြင်းတူပေမယ့်လိုအပ်တာခြင်းမတူဘူး
ဒီအစာကို ကိုယ်မစားရင် အသက်မသေနိုင်သေးဘူး။ သူကသေနိုင်တယ်ဒီတော့သူ့ကိုသာငါစားခိုင်းမယ်လို့
အတွေးမျိုးဝင်ပြီး ဆာလောင်စိတ်ကိုအနိုင်ယူလှူလိုက်ရရင်တော့ ပြောမပြ တတ်အောင်တစ်ဘက်လူက၀မ်းသာသွားသလို
ကိုယ်တိုင်လည်းကြက်သီးမွှေးညှင်းထလောက်အောင်နှစ်သက်မှုတွေရရှိလိမ့် မယ်။
အဲအလှူမျိုးကတော့လှူနိုင်ဖို့ခက်ခဲသလို အကျိုးကျေးဇူးကျတော့လည်းအလွန်ကြီးမားလှတယ်။
ဘယ်လိုအလှူမျိုးပဲဖြစ် ဖြစ်ပါမောင်မယ်တို့တွေစေတနာ မပျက်လှူဒါန်းစေချင်တာကိုယ့်စေတနာပေါ့။
အလှူဆိုတာ မျှတတဲ့အတွေးကိုတွေးတာ မရှိသူ ကိုရှိသူကကိုယ်ချင်းစာပြီး ညာတာထောက်ထားလှူဒါန်းရင်
လောကထဲမှာလေ ဆင်းရဲတဲ့လူတွေဆိုတာရှားပါးပြီးကိုယ့်ပတ်ဝန်း ကျင်မှာ စိတ်ဆင်းရဲစရာ မနှစ်မြို့မသာယာဖွယ်ရာတွေဝေးရမှာ။
ဒါကြောင့်စီးပွားရေးလုပ်တယ်ဆိုရင်တောင် ချမ်းသာသူကဆင်းရဲသူကိုလှူဒါန်းတဲ့အနေနဲ့
အခွင့်အရေးပိုပေးသင့်တယ်။ ဆင်းရဲရတဲ့အထဲ သီးနှံဈေးနှိမ်ချဝယ်ယူခံရတဲ့တောင်သူတွေလိုမဖြစ်ပါစေနဲ့
။တန်ဖိုးထက် ပိုပေးလှူသင့်တယ်။ဒါမှသာလျှင်ဆင်း ရဲသူနည်းတော့ လူ့ပတ်ဝန်းကျင်မှာ ခိုးသူ
ဝှက်သူ လုယက်သူ ဓါးပြတိုက်သူတွေကင်းဝေးမှာ။ ခိုးဝှက်လုယက်တယ်ဆိုတာ တ ကယ်တော့ဆင်းရဲခြင်းကြောင့်ဖြစ်ပေါ်လာတဲ့ဘေးထွက်ဆိုးကျိုးတွေပဲ။
ကိုယ့်နိုင်ငံကလူတွေ ဆင်းရဲတာ သူခိုးဓါးပြပေါတာကို ပြဿနာတွေဖြစ်ဆူပူတာကို မဖြစ်စေချင်ရင်တော့
ဆင်းရဲသူတွေကိုလုပ်ပိုင်ခွင့်တွေပေးသင့်တယ်။ ချမ်းသာသူသာ ဖော်စားသွား တဲ့အဖြစ်မျိုးရှောင်ရှားသင့်တယ်။
ဆင်းရဲမွဲတေနုံချာသူတွေအတွက် စာနာတရားထားပြီး ရှိသူများက ပစ္စည်းမနှိမ်ဈေးမချိန်ပဲ
လှူ ဒါန်းသောအား သဘောထားကာ ကူညီစောင့်ရှောက်ဖေးမသင့်တယ်။
ချမ်းသာနေသူတစ်ပါးသူကလာယူတာကိုပေးလိုက်ခြင်းထက်။
ဆင်းရဲနေသူ ကိုယ့်ပြည်သူကိုပေးလိုက်ခြင်းက အငတ် ကမ္ဘာကင်းရေး ပြဿနာဝေးအောင်လုပ်ပေးခြင်းဖြစ်တယ်ဆိုတာမောင်မယ်တို့တစ်တွေ
သဘောထားပြီးလှူဒါန်းခြင်းဖြင့် တိုင်း ပြည်ငြိမ်းချမ်းအောင် စည်ပင်ဝပြောအောင် စိတ်ဆင်းရဲစရာတွေကင်းဝေးအောင်ဆောင်ရွက်နိုင်ကြပါစေကွာ။
ဒါနဆိုတာ၊ ယူတာပါ၊ လှူတာမြတ်လှသည်။
လိုအပ်သူအား၊ လှူလိုက်ငြား၊ အများချမ်းသာသည်။
ကူညီဖေးဖ ၊လှူဒါန်းက ၊ ပြည့်ဝတို့တိုင်းပြည်။
ကိုယ်သာပိုင်လို၊ စိတ်ဝန်တို၊ ပြည်ကိုဆူပူစေတော့မည်။
ခိုးဝှက်ဓါးပြ၊ ဝေးစေက၊ တို့ကဝေငှပေးဖို့လို။
ကိုယ့်အိတ်ကြီးပဲ၊ ပြည့်အက်ကွဲ၊ အလွဲရှောင်တော့ဗျို။
အားလုံးကိုချစ်ခင်လေးစားတန်ဖိုးထားလျှက်…..
ပီတိ(ပေကြီး)
a
No comments:
Post a Comment